الصبر

من طرف **hanoda** الأربعاء فبراير 13, 2008 3:59 pm

فى ناس كتير تيجى تقولك انا عندى مشكله وعايزه حل عملى ولما تقولهم اصبروا يقوموا يردوا احنا عايزين حل عملى وكان الصبر ده كلام وخلاص وده شئ يضايق اى انسان مسلم

الصبر ده نص الايمان .. وهو اصلا مبدا اساسى من مبادئ ديننا
واللى هايساعد الانسان على الصبر انه يعرفو ويفهم قيمتو فالكون ده اساسه الصبر
لو لاحظنا هانلاقى ان الكون قام على فكره التدرج .. فالشمس مابتزهرش فجاه فى السما وانما بترتفع خطوه بخطوه .. والزرع مابينبتش فجاه انما بيحتاج الى صبر ورعايه على مايكبر.. والجنين كمان مابيكبرش فجاه .. حتى ان ربنا لما خلق السماوات والارض خلقهم فى 6 ايام ..عشان يعرفنا ان فيه حاجه اسمها صبر .. ده اسم الصبور من اسماء الله
ولو بصينا حولينا فى كل حاجه هانلاقيها اساسها الصبر يعنى ... مافيش فريضه من الفرائض تتعمل من غير صير .. الصلاه .. قيام الليل.. الصوم .. الحج .. حتى ترك المعصيه .. كل دول يحتاجو للصبر

ودى نماذج النبياء الصابرين
وانا هاحكلكم حكايتهم عشان تقول لنفسك لما دول حبايب ربنا وكل ده حصلهم ومع كده صبرو ياترى انا هاصبر ولا لا؟
سيدنا نوح:
نتخيل مع بعض 950 سنه بيدعو قومه وما امنش معاه الا القليل
اكتر عدد قالو العلماء 80 مؤمن يعنى كل 12 سنه بيؤمن واحد وكان سيدنا نوح صابر وبيدعوهم
وبعد 950 سنه يقول له الله ابن سفينه فى الصحراء فبدا فى بناءها والكفار يستهزؤا بيه وهو يستحمل ويصبر

سيدنا ايوب عليه السلام
عاش 80 سنه سعيد وبعدين عاش 18 سنه تعبان ولما مراته قالتله ادعى ربنا يخفف عنك شويه قالها اتكسف من ربنا بقى يعيشنى 80 سنه سعيد وانا مش قادر اصبر على 18 سنه وانا تعبان ولما دعى ربنا ماقلهوش يارب خلصنى من الانا فيه ولكن قال انا وضعى كذا وكذا وانت ارحم الراحمين
ده الواحد لما بيجيلو مغص نس ساعه بس يقول ليه بس كده ياربنا .. يارب اخف بسرعه .. مش قادر

سيدنا محمد صلى الله عليه وسلم
ومتهيقلى ان مافيش حد ربنا ابتلاه زى الرسول ومع كده كان صبور
يعنى لما بيموتلنا حد من الاهل بنحزن عليه ويمكن بنسهر الليالى واحنا بنعيط عليه
فتخيلو رسول الله وهو احب خلقه
يولد يتيم الاب ثم تموت امه ثم جده ثم عمه
مات له سبعه اولاد وكان اخرهم ابنه ابراهيم ولما اتولد كان الرسول كبير فى السن فقبل موته بتلت سنين ولد ابراهيم ففرح بيه جدا وكان بيمر على بيوت الصحابه ويوريهم ابراهيم ومافتش الا شويه شهور قليله ومات ابراهيم .. وتموت رقيقه وام كلثوم والسيده زينب بنات الرسول .. وتموت زوجته الحبيبه السيده خديجه .. ويموت العم اللى كان بينصره ويساعده
وغير كده بعد لما كان بينادى بالصادق الامين بقى ينادى بالكاذب المجنون
تخيلو يتهم كمان فى عرضه شهر كامل وكان بيتقال على السيده عائشه كلام ........
وكان كمان بيجاهد فى سبيل دينه ويعد اوقات كتيره من غير اكل لانه ماكنش بيلاقى اكل فيقوم حاطط حجرين على بطنه من شده الجوع
واوحش حاجه اتعرضلها لما يروح لاهل الطائف عشان يدعوهم فيرموه بالحجاره وناس تقوله ربنا مالقاش احسن منك يبعتهولنا وغيرهم يقولوا والله لو شوفتك متعلق باستار الكعبه وتحلف انك نبى مش حاصدقك
ولما خرج فى غزوه احد يقع فى حفره فتنكسر الرباعيه ووشه يتملى دم ويقول (اللهم اهد قومى فانهم لايعلمون )

ياترى عرفتم حد فى البشريه دى كلها حصله زى الرسول ؟؟؟؟
ومع كل الابتلاءات دى كان يقف امام الله ويقول (لبيك وسعديك وانا بين يديك والخير كله اليك والشر ليس اليك ) ويقول (اللهم انى اسالك لذه النظر الى وجهك والشوق الى لقائك )
شوفت حد عندو الابتلاءات دى ويصبر كده؟؟؟
ويقول (خشع لك سمعى وبصرى ومخى وعظمى )
انما الناس لما بيبلوا بيدايقوا ويقوله ليه ربنا بيعمل فينا كده واشمعنى احنا والكلام اللى بنسمعه واكيد بنقوله
وينسو الافضال اللى ربنا نعمها علينا

اتمنى من كل انسان مؤمن يقرا كلامى انه على قد مايقدر يتحلى بالصبر ويفتكر الانبياء واللى كان بيحصلهم
ويفتكر نعم ربنا والخيرات اللى ادهاله
ويكون دائم الشكر